Azərbaycan Milli Elmlər Akademiyası

Azərbaycan xalqının Ümummilli Lideri Heydər Əliyevin 100 illik yubileyinə həsr edilmiş, böyük siyasi və dövlət xadiminin həyat və fəaliyyətini əks etdirən məqalələr toplusu Bolqarıstan Respublikasının «Български писател» nəşriyyatında bolqar dilində nəfis şəkildə çap edilib. Kitabın ərsəyə gətirilməsinin sponsorları Azərbaycan Beynəlxalq İnkişaf Agentliyi (AİDA) və Azərbaycan Respublikasının Bolqarıstan Respublikasındakı səfirliyi olub. Əsas tərtibatçı Sofiya Universitetinin Azərbaycan Dili və Mədəniiyyəti Mərkəzinin direktoru Sofiya Şiqayeva-Mitreskadır.

Kitaba AMEA-nın vitse-prezidenti akademik İradə Hüseynovanın “Heydər Əliyev və müasir Azərbaycan elminin inkişafı” adlı məqaləsi də daxil edilib. Məqalədə qeyd edilir ki, Ulu Öndərin inkişaf və tərəqqi siyasətinin milli məfkurəyə və dərin elmi təhlillərə, ölkənin elmi potensialının daim gücləndirilməsinə və bu potensialdan maksimum səmərəli istifadəyə əsaslanması onun ardıcıllığını, davamlılığını, tarixi uğurlarını təmin edib. Azərbaycan xalqının böyük rəhbərinin elm və təhsilin əhəmiyyətinə verdiyi dəyər cəmiyyət həyatının bütün digər sektorlarının dayanıqlılığı və inkişafı üçün çox böyük önəm daşıyıb.

Kitabda, həmçinin Bolqarıstan-Azərbaycan əlaqələrinin tarixi, Bolqarıstan prezidentlərinin Ulu Öndərin şəxsiyyəti və xalqlarımız arasında dostluq münasibətlərinin inkişafında rolu barədə fikirləri yer alıb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.