Azərbaycan Milli Elmlər Akademiyası

Elm və Təhsil Nazirliyinin Botanika İnstitutunda 27 sentyabr - Anım Gününə həsr olunmuş tədbir keçirilib.

Tədbir öncəsi institut əməkdaşları II Şəhidlər xiyabanına ziyarət edib, Azərbaycanın ərazi bütövlüyü uğrunda canlarından keçən Vətən övladlarının əziz xatirəsi ehtiramla yad edilib, məzarları üzərinə çiçəklər düzülüb.

Tədbir Dövlət Himnimizin səsləndirilməsi və şəhidlərimizin əziz xatirəsinin bir dəqiqəlik sükutla anılması ilə başlayıb.

Yığıncaqda institutun baş direktoru professor, b.e.d. Səyyarə İbadullayeva Müzəffər Ali Baş Komandan İlham Əliyevin rəhbərliyi, möhkəm iradəsi, uzaqgörən strategiyası, uğurlu xarici-daxili siyasəti nəticəsində xalqımızın  44 gün ərzində qazandığı möhtəşəm tarixi qələbədən söz açıb. O, Vətən müharibəsində cəmiyyətimizin nümayiş etdirdiyi səfərbərlikdən, igidlərimizin müharibə dövründə göstərdikləri şücaətdən danışıb, torpaqlarımızın işğaldan azad edilməsində, tarixi qələbənin qazanılmasında qəhrəmanlıq göstərərək, canını vətən uğrunda qurban vermiş şəhidlərimizə Allahdan rəhmət diləyib.

Tədbirdə çıxış edənlər II Qarabağ müharibəsində qazanılmış Zəfəri parlaq qələbə, mənəviyyat hadisəsi, milli qürur və milli ləyaqətin bərpası olduğunu qeyd ediblər.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.