Azərbaycan Milli Elmlər Akademiyası

Elm və Təhsil Nazirliyinin Radiasiya Problemləri İnstitutu Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi haqqında Azərbaycan Respublikası Prezidentinin Sərəncamından irəli gələn vəzifələrin icrası və COP29-la bağlı silsilə tədbirləri davam etdirir.

Cari il COP29-un Azərbaycanda keçirilməsi və 2024-cü ilin “Yaşıl dünya naminə həmrəylik ili” elan edilməsi ölkəmizin ekoloji problemlərə diqqət göstərdiyini açıq şəkildə nümayiş etdirir. Vətəndaş cəmiyyəti, Elm və Təhsil sektorlarının əməkdaşlığı şəraitində təşkil olunan “Plastiksiz yaşıl dünya naminə həmrəylik” və COP29-a həsr olunmuş dəyirmi masada Radiasiya Problemləri İnstitutu, “Ruzgar” Ekoloji İctimai Birliyi və Azərbaycan Memarlıq və İnşaat Universitetinin əməkdaşları məruzələrlə çıxış ediblər. Növbəti dəyirmi masa Sumqayıt şəhərində Ekologiya və Təbii Sərvətlər Nazirliyinin 4 saylı Regional idarəsində keçirilmişdir. Tədbirdə Elm və Təhsil Nazirliyinin Polimer Materiallar İnstitutunun, Sumqayıt Dövlət Universitetinin, “Təmizlik” ASC-in və digər təşkilatların nümayəndələri iştirak etmişlər.

Dəyirmi masada plastik tullantıların ətraf mühitə və insan sağlamlığına təsiri və onların idarə olunmasında qarşıya çıxan problemlər ətraflı müzakirə olunmuş, bu problemlərin həlli yolları barədə geniş məlumat verilmişdir.

AMEA-nın müxbir üzvü İslam Mustafayev “Plastik tullantıların idarə olunması: Problemlər və onların həlli yolları”, AzMİU-nun dosenti, kimya üzrə fəlsəfə doktoru Rəna Xankişiyeva “Azərbaycanda plastiklərin istehsalı və onların xassələri”, fizika üzrə fəlsəfə doktoru, dosent Əminə Mikayılova “Yaşıl dünya naminə həmrəylik ilində COP29-a doğru” adlı məruzələr etmişlər. Bu silsilə tədbirlər bundan əvvəl, Şəkidə, Mingəçevirdə, Gəncədə, Xaçmazda, İsmayıllıda və Lənkəranda Azərbaycan Respublikası Elm və təhsil Nazirliyinin “Yaşıl dünya naminə həmrəylik” və COP29-a aid Tədbirlər planına və Qeyri-Hökumət Təşkilatlarına Dövlət Dəstəyi Agentliyinin Proqramına uyğun olaraq həyata keçirilmişdir. Tədbirin təşkili Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin “Ruzgar” Ekoloji İctimai Birliyinə ayrılmış Qrantı hesabına həyata keçirilib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.