Azərbaycan Milli Elmlər Akademiyası

Oktyabrın 29-da Astanadakı L.N.Qumilyov adına Avrasiya Milli Universitetində “Dil və ədəbi irs birliyin təməlidir” mövzusunda keçirilən elmi seminar çərçivəsində Türk Akademiyasının nəşr etdirdiyi kitabların təqdimatı olub.

Tədbirdə Türk Akademiyasının vitse-prezidenti Asxat Kesikbayev, L.N.Qumilyov adına Avrasiya Milli Universitetinin prorektoru Ardak Beysenbay, Azərbaycanın Qazaxıstandakı səfiri Ağalar Atamoğlanov, Qırğızıstanın səfiri Dastan Dyuşekeyev, Türkmənistanın səfiri Batır Recepov, Türkiyə səfirliyinin təhsil müşaviri Ömer İnan, eləcə də digər diplomatik nümayəndəliklərin və elmi ictimaiyyətin təmsilçiləri iştirak ediblər.

Təqdim olunan əsərlər arasında Krım-tatar şairi və türkşünas alim Bəkir Çobanzadənin ilk dəfə qazax dilinə “Tiltutka” adı ilə tərcümə edilmiş seçilmiş əsərlər toplusu diqqəti cəlb edib. Kitabda müəllifin türkşünaslıq üçün əhəmiyyətli olan əsas tədqiqatları yer alıb.

Təqdimat mərasimində Türk Akademiyasının 37-dən çox sahəni əhatə edən “Türk dillərinin terminoloji lüğətləri”nin yaradılması layihəsi də təqdim olunub. İqtisadiyyat, tibb və hərbi sahələrə aid lüğətlər təqdim olunub ki, onların yaradılması elmi terminologiyanın standartlaşdırılması istiqamətində mühüm addım sayıla bilər.

Nəşrlər arasında Axmet Buranın böyük türkmən şairi Məhtimqulu Fəraqinin 300 illik yubileyinə həsr olunmuş “Məhtimqulu” monoqrafiyası və Azər Turanın irsi mədəniyyət, elm və ədəbiyyat sahələrini əhatə edən Türk dünyasının görkəmli simalarından birinə həsr etdiyi “Əli bəy Hüseynzadə” kitabı təqdim olunub.

Şairlər Məhəmmədhüseyn Şəhriyar və Bulud Qaraçorlu Səhəndin əsərlərindən ibarət Azərbaycan poeziya toplusu qonaqların marağına səbəb olub, mədəni əlaqələrin möhkəmləndirilməsində ədəbi irsin əhəmiyyətini vurğulayıb.

Türk Akademiyasının vitse-prezidenti Asxat Kesikbayev çıxışında Akademiyanın prezidenti Şahin Mustafayevin təbrikini çatdıraraq qeyd edib ki, Akademiyanın hər bir yeni nəşri təkcə elmi iş deyil, həm də türk xalqlarının elmi inteqrasiyasının möhkəmləndirilməsinə mühüm töhfədir.

Tədbir iştirakçıları türk xalqlarının mədəni irsinin təbliği və inkişafına verdiyi mühüm töhfəyə görə Türk Akademiyasına minnətdarlıq ediblər və bu cür nəşrlərin vahid elmi məkanın yaradılmasına kömək etdiyini, Türk dünyası alimləri arasında bilik mübadiləsi imkanlarını genişləndirdiyini vurğulayıblar.

AzərTac