Azərbaycan Milli Elmlər Akademiyası

AMEA-nın akademik Ziya Bünyadov adına Şərqşünaslıq İnstitutunun elmi-kütləvi nəşri olan “Azərbaycan şərqşünaslığı” jurnalının növbəti sayı nəşr olunub.

Sovet İttifaqı Qəhrəmanı, akademik Ziya Bünyadovun 100 illik yubileyinə həsr olunmuş rubrikada akademik Gövhər Baxşəliyevanın “Zaman anlamının fövqündə duran böyük alim” və özbəkistanlı professor Həmidulla Boltaboyevin “Mərkəzi Asiyanın mədəniyyət tarixi akademik Ziya Bünyadovun tədqiqatlarında” adlı məqalələri, eləcə də Şərqşünaslıq İnstitutunda yubileylə bağlı keçirilmiş konfrans barədə məlumat yer alır.

“Ədəbiyyat” bölməsində Cənubi Azərbaycan ədəbiyyatının nümayəndələri fədai şair Sədi Yüzbəndi və Hüseyn Məhəmməzadə Sədiq Düzgünə həsr olunmuş məqalələr təqdim edilir.

“Uzaq Şərq” bölməsindəki məqalələr Ukraynadakı hərbi əməliyyatlarla bağlı Çinin mövqeyinə və Cənubi Qafqazla Cənubi Koreya arasındakı əməkdaşlığın siyasi, iqtisadi və humanitar aspektlərinə həsr olunub.

“Şərq bu gün” bölməsində Suriya böhranının nizamlanmasında Rusiya-Türkiyə əməkdaşlığının rolundan bəhs edilir.

Jurnalda, həmçinin Şərqşünaslıq İnstitutunda aparılan ən yeni tədqiqatlar, institut alimlərinin Azərbaycan həqiqətlərinin dünyaya çatdırılmasında rolu, beynəlxalq elmi tədbirlərdə iştirakı barədə məqalələrlə də tanış olmaq mümkündür.

 Bundan əlavə təltif olunan şərqşünaslar, institutda çap olunan yeni kitablar və keçirilən tədbirlər barədə məlumatlar da jurnalın səhifələrində yer alır.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.