Azərbaycan Milli Elmlər Akademiyası

AMEA-nın Məhəmməd Füzuli adına Əlyazmalar İnstitutunda Ümummilli Lider Heydər Əliyevin vəfatının 21-ci ildönümü münasibətilə anım tədbiri keçirilib.

Öncə Ulu öndər Heydər Əliyevin əziz xatirəsi bir dəqiqəlik sükutla yad edilib və Azərbaycan Respublikasının Dövlət Himni səsləndirilib.

İnstitutun direktoru, akademik Teymur Kərimli tədbiri giriş nitqi ilə açaraq Heydər Əliyevin dahi lider kimi fəaliyyətindən, Azərbaycan ədəbiyyatı və mədəniyyətinə olan diqqətindən bəhs edərək Əlyazmalar İnstitutunun Ulu Öndərin bilavasitə qayğısı ilə əhatə olunan elmi müəssisələrdən biri olduğunu vurğulayıb. Akademik “Kitabi-Dədə Qorqudun yubileyi”nin keçirildiyi dövrü yada salaraq qeyd edib ki, Heydər Əliyev bütün Türk dünyasının Bakıya toplaşmasının təşəbbüskarı olub və biz onun sayəsində Dədə Qorqud abidəsinin əsl varisi olduğumuzu beynəlxalq aləmdə sübut edə bilmişik. Giriş nitqindən sonra T.Kərimli çıxış üçün sözü məruzəçilərə verib.

İnstitutun Biblioqrafiya şöbəsinin əməkdaşları - baş biblioqraf Təranə Cavadova “Ümummilli Lider Heydər Əliyev”, baş mütəxəssis Gülnarə Ağayeva “Multikulturalizmin inkişafında Azərbaycanın Ümummilli Lideri Heydər Əliyevin rolu”, böyük laborant Nəsibə Murtuzayeva “Ulu Öndər Heydər Əliyevin Azərbaycan ədəbiyyatının inkişafındakı rolu”, biblioqraf Fəxriyyə Tarverdiyeva “Heydər Əliyev Azərbaycanın müstəqilliyi uğrunda mübarizədə əvəzedilməz bir liderdir”, Əlyazmaların elmi ekspozisiyası və təqdimi şöbəsinin böyük elmi işçisi Sevinc Dadaşova “Heydər Əliyevin mədəni irsimizə verdiyi töhfələr” və Sənədlərlə iş şöbəsinin mütəxəssisi Çinarə Qəbulova “Naxçıvan müstəqillik illərində” mövzularında məruzə edib, çıxışlarında bugünkü Azərbaycanın Ümummilli lider Heydər Əliyevin əsəri olduğunu və onun xatirəsinin hər zaman əziz tutulacağını vurğulayıblar.

Sonda tədbir iştirakçıları institut kitabxanasının Ulu Öndər Heydər Əliyevə həsr olunmuş geniş kitab sərgisi və Əlyazmaların elmi ekspozisiyası və təqdimi şöbəsinin hazırladığı “Naxçıvana dair və naxçıvanlı müəlliflərin əsərlərinin əlyazmaları”ndan ibarət sərgi ilə tanış olublar.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.