Azərbaycan Milli Elmlər Akademiyası

AMEA-nın Folklor İnstitutunda Xocalı soyqırımının 33-cü ildönümünə həsr olunmuş “Xocalıda o gecə...” adlı anım tədbiri keçirilib.

İnstitutun YAP Ərazi Partiya Təşkilatının dəstəyi ilə keçirilən tədbirdə əvvəlcə Azərbaycan Respublikasının Dövlət Himni səsləndirilib. Vətənimizin azadlığı və ərazi bütövlüyü uğrunda canlarını fəda etmiş şəhidlərimizin və Xocalı soyqırımı qurbanlarının xatirəsi bir dəqiqəlik sükutla yad edilib.

Sonra Folklor studiyasının hazırladığı “Xocalıda o gecə...” sənədli filmi nümayiş olunub.

Tədbiri giriş sözü ilə Folklor İnstitutunun direktoru, dosent Hikmət Quliyev açıb. Bildirib ki, biz bu gün etnik və milli ayrıseçkilik zəminində erməni qəsbkarlarının xalqımıza qarşı törətdiyi qətliamlardan biri - Xocalı soyqırımının 33-cü ildönümünü yad edirik. Bu qətliam təkcə Azərbaycan xalqına deyil, bütövlükdə, insanlığa, bəşəriyyətə, insani dəyərlərə qarşı yönəlmiş ən ağır cinayətlərdən biridir. Beynəlxalq hüquqa görə, Xocalı qətliamı bir xalqın soyunu, kökünü məhv etməyə yönəlmiş soyqırımı aktıdır. O vurğulayıb ki, dövlətimiz Xocalı soyqırımı baş verəndən bu günədək “Xocalıya ədalət!” kampaniyasını bir gün belə dayandırmayıb, Xocalı ilə bağlı həqiqətlərin dünya ictimaiyyətinə çatdırılması istiqamətində mühüm addımlar atıb. Nəhayət, Azərbaycan Respublikasının Prezidenti, Müzəffər Ali Baş Komandan İlham Əliyevin uzaqgörən siyasəti, güclü Ordumuzun rəşadəti sayəsində tarixi ədalət bərqərar olub, Xocalı da, Qarabağ da, Şərqi Zəngəzur da əsl sahiblərinə qayıdıb.

“Bu gün biz Xocalı soyqırımını yad edərkən kədərlə yanaşı, həm də qürur hissi keçiririk. Qürurluyuq ki, Xocalı əsl sahiblərinə qaytarılıb, bu yurdun əzəli-əbədi sakinləri artıq yenidən qurulan, abadlaşan Xocalıda məskunlaşıblar” deyə Hikmət Quliyev qeyd edib.  

Sonra söz tədbirdə qonaq qismində iştirak edən Xocalı sakinləri Nazim Hüseynov və Eldəniz Ağayevə verilib. Onlar Xocalıda soyqırım dəhşətinin birbaşa şahidləri kimi erməni vəhşiliyi və vandalizmi haqqında danışıblar. Qeyd ediblər ki, həmin gecə Xocalıda baş verənləri unutmaq, yaddaşdan silmək qeyri-mümkün olsa da, bu gün azad Xocalını görmək, o torpaqlara ayaq basmaq olduqca böyük qürur və sevinc bəxş edir.   

Daha sonra institutun elmi işlər üzrə direktor müavini, fil.ü.f.d., dos. Afaq Ramazanova, Folklor İnstitutu YAP Ərazi Partiya Təşkilatının sədri, fil.ü.f.d., dos. İlhamə Qəsəbova, Nəşriyyat şöbəsinin müdiri Mahir Cavadlı, Folklor studiyasının rəhbəri Mahir Ordubadi çıxış edərək Xocalı faciəsinin xalqımıza qarşı törədilmiş ən dəhşətli və qəddar cinayətlərdən biri olduğunu və bu cinayətə dünya səviyyəsində hüquqi qiymət verilməsinin zəruriliyini vurğulayıblar.

Sonda institutun direktoru, dos. Hikmət Quliyev tədbirdə qonaq qismində iştirak edən Xocalı sakinlərinə minnətdarlığını ifadə edib, xatirə şəkilləri çəkilib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.