Azərbaycan Milli Elmlər Akademiyası

AMEA-nın Milli Azərbaycan Tarixi Muzeyində İsrail Yazıçılar Birliyinin üzvü və Azərbaycan Yazıçılar Birliyinin fəxri üzvü, şair Mixail Salmanın “Müzəffər Azərbaycan” kitabının təqdimat mərasimi keçirilib. Azərbaycanın 44 günlük müharibəsindəki qələbəsinə həsr olunmuş kitabda Azərbaycanın tarixinə, mədəniyyətinə və incəsənətinə dair şeirlər yer alıb.

Tədbir Azərbaycan ilə İsrail arasında diplomatik əlaqələrin qurulmasının 30 illiyinə və “Azİz” Azərbaycan-İsrail Beynəlxalq Assosiasiyasının yaranmasının 15 illiyinə həsr olunub.

Təqdimat mərasimində millət vəkilləri, İsrail-Azərbaycan Beynəlxalq “Azİz” Assosiasiyasının üzvləri, Azərbaycanın görkəmli elm və mədəniyyət nümayəndələri, ictimai xadimlər iştirak ediblər.

Yığıncağı giriş sözü ilə qeyd olunan assosiasiyanın Azərbaycan Mədəniyyət Mərkəzinin direktoru, Mixail Salmanın həyat yoldaşı Yeganə Salman açıb.

Daha sonra Milli Azərbaycan Tarixi Muzeyinin baş direktoru, akademik Nailə Vəlixanlı, muzeyin icraçı direktoru, dosent Fərhad Cabbarov, Milli Məclisin deputatları Rasim Musabəyov və Sevil Mikayılova, tarixçi Fuad Axundov, rejissor Oqtay Mirqasımov, “Azİz”in rəhbəri Lev Spivak, kitabın müəllifi Mixail Salman və digər tanınmış şəxslər çıxış ediblər.

Qeyd edək ki, “Azərbaycan eşqi ilə” adlı şeirlər toplusunun müəllifi olan M.Salmanın şeirləri İsrail, Azərbaycan, Ukrayna, ABŞ və Almaniyanın dövri mətbuatında mütəmadi dərc olunur.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.