Azərbaycan Milli Elmlər Akademiyası

AMEA-nın akademik H.Ə.Əliyev adına Coğrafiya İnstitutunun Geoinformatika və kartoqrafiya şöbəsinin kiçik elmi işçisi Nazim Gəraylı “İqlim asılılığı olmayan ağıllı kənd təsərrüfatı” adlı layihəsi Almaniya Beynəlxalq Əməkdaşlıq Cəmiyyətinin təşkil etdiyi Greenovation qrant müsabiqəsinin Azərbaycan üzrə qalibi olub.

Layihənin əsas məqsədi akvaponika sistemlərində müxtəlif növ bitkilərin yetişdirilməsi, torpaqsız əkinçiliyin Azərbaycanda tətbiq imkanlarını öyrənməkdir.

Layihənin təqdimatı 18-20 may tarixlərində Bakı Ekspo Mərkəzində təşkil olunan 15-ci Azərbaycan Beynəlxalq Kənd Təsərrüfatı sərgisində keçirilib.

Nazim Gəraylının sözlərinə görə, müasir kənd təsərrüfatı texnologiyalarından kifayət qədər geniş miqyasda istifadə edilməsinə baxmayaraq, hələ də çox böyük ərazilərə və böyük həcmdə içməli su ehtiyatlarına ehtiyac var. Xüsusən də Cənubi Qafqazın dağlıq relyefi bütün ərazilərin səmərəli şəkildə istifadəsinə mane olur. Son onilliklərdə müxtəlif alternativ əkinçilik modelləri təklif olunub ki, onların geniş miqyasda tətbiqi üçün iqlim, mövsüm və relyefdən asılılıq mümkün qədər azaldılmalı, orqanik məhsul yetişdirilməsinə şərait yaradılmalıdır.

Bunlarla yanaşı, ənənəvi əkinçilikdə içməli su israfı, sintetik gübrə istifadəsi, herbisit və pestisitlərin istifadəsi, torpaqların strukturunun dəyişməsi, dincə qoyulmasına ehtiyacın yaranması kimi həlli vacib olan  bir çox aktual problemlər də yox deyildir.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.