Azərbaycan Milli Elmlər Akademiyası

Elm və Təhsil Nazirliyinin akademik H.Əliyev adına Coğrafiya İnstitutunun baş direktoru, coğrafiya elmləri doktoru Zakir Eminov və Demoqrafiya və əhali coğrafiyası şöbəsinin böyük elmi işçisi, coğrafiya üzrə fəlsəfə doktoru Etibar Bədəlov Bakının Yeni Suraxanı qəsəbəsinin 101 saylı tam orta məktəbində yeni yaradılan “Kiçik Akademiya”nın hesabat iclasında iştirak ediblər.

Elm və Təhsil Nazirliyinin Bakı Şəhəri üzrə Təhsil İdarəsinin nümayəndəsi və 89 saylı orta məktəbin direktoru Dadaş Babazadə də tədbirdə iştirak edib.

Müəssisə rəhbəri Z.Eminov tədbir iştirakçılarını institutun fəaliyyəti ilə tanış edib,  onun tədqiqat sahələri, tanınmış alimləri, əhəmiyyətli nəşrləri, coğrafi problemlər və s. haqqında söhbət açıb. O bildirib ki, institutda və ya məktəblərdə şagird və müəllim kollektivləri ilə mütəmadi keçirilən görüşlər ənənə halını alıb və belə görüşlər yeniyetmələrdə elmə marağı artırır, onların gələcəkdə peşə seçimində əhəmiyyətli rol oynayır.

Sonra “Kiçik Akademiya”nın istedadlı şagirdləri “Bacarıq ağlın nişanəsidir” adlı proqramla çıxış ediblər. Şagirdlər “Ekoloji təmiz cərəyan”, “Azərbaycanda alternativ enerji mənbələrindən istifadə”, “Sintetik yuyucu vasitələrin ekologiyaya və insan orqanizminə təsiri”  mövzuları ilə təqdimatlar ediblər. Rəqs proqramı ilə çıxış edən uşaqlar bacarıqlarını nümayiş etdiriblər.

Sonda “Kiçik Akademiya”nın tədbirdə fəal iştirak edən şagirdlərinə Elm və Təhsil Nazirliyinin təşəkkürnaməsini təqdim edən məktəbin direktoru Sitarə Abbasova tədbirdə iştirak etdiyinə görə institut rəhbərliyinə təşəkkürünü bildirib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.