Azərbaycan Milli Elmlər Akademiyası

Elm və Təhsil Nazirliyinin İdarəetmə Sistemləri İnstitutunun baş elmi işçisi, Bakı Dövlət Universitetinin Hesablama riyaziyyatı kafedrasının müdiri AMEA-nın müxbir üzvü Vaqif İbrahimov Dubayda keçirilən 1-ci Dünya Elm Çempionatında qələbə qazanaraq Beynəlxalq Tarix Bioqrafiya İnstitutu tərəfindən gümüş mükafata layiq görülüb.

Sözügedən çempionatda 69 ölkədən 1236 iştirakçı iştirak edib, 38 müxtəlif elm sahəsi üzrə işlər təqdim olunaraq 360 alim mükafatlandırılıb.

Münsiflər arasında 30-dan çox Nobel mükafatçısı olan çempionata qatılan ölkələr üzrə komanda təsnifatında: 1-ci yer - Çin, 2-ci yer - ABŞ, 3-cü yer - BƏƏ, 4-cü yer - Hindistan, 5-ci yer - Fransa, 11-ci yer - Almaniya, 13-cü yer - Sinqapur, 14-cü yer -  Qazaxıstan, 15-ci yer - Polşa, 16-cı yer - Özbəkistan, 17-ci yer - İsveçrə, 18-ci yer - Azərbaycan, 19-cu yer - CAR olub.

Qeyd edək ki, 1-ci Dünya Elm Çempionatının qaliblərinin böyük əksəriyyəti daha əvvəl Dubayda “Nobel mükafatları: müvəffəqiyyətli şəxsiyyətin formalaşdırılması və ətraf mühitin dəyişdirilməsi üçün təcrübə və peşəkar nailiyyətlərin öyrənilməsi” beynəlxalq elmi təcrübə proqramını başa vurub. Alimlərin əldə etdikləri nəticələr beynəlxalq universitet reytinqlərində nümayiş etdiriləcək.

Mükafatlandırılmış 360 alimdən 76-sı qalib olaraq gümüş və bürünc diplomlarla təltif edilib. Beynəlxalq Elm Çempionatı 6 dövlətin təsis etdiyi (Birləşmiş Ərəb Əmirlikləri, ABŞ, İtaliya, Bolqarıstan, İsrail və Çin) “International Historical Biographical Institute” tərəfindən təşkil olunub. Bu təşkilat Elm Çempionatının qaliblərinə - istənilən ölkəyə “İstedad vizasının” verilməsi, çalışdıqları müəssisələrin reytinqlərinin yüksəldilməsi, fəaliyyət göstərdikləri sahələrdə 1 №-li ixtisasçı olması, öz ölkələrində və xarici ölkələrdə yüksək vəzifələrə təyin olunması və elmi məqalələrin beynəlxalq elmi bazalarda yerləşdirilməsi kimi imtiyazlardan istifadə etmək hüququ verir.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.