Azərbaycan Milli Elmlər Akademiyası

Hindistanlı alim Saçidanand Coşinin (Dr. Sachchidanand Joshi) Nizami Muzeyinin qonağı olub.

Saçidanand Coşi akademik, tanınmış yazıçı və teatr rəssamıdır. 2016-cı ildən Hindistan Mədəniyyət Nazirliyi nəzdində incəsənət və mədəniyyət sahəsində əsas qurum olan İndira Qandi Milli İncəsənət Mərkəzinin (IGNCA) katibidir. Onun media, kommunikasiya, tarix, mədəniyyət, təhsil, siyasət və digər mövzularda geniş yazıları var. Eləcə də, nüfuzlu qurumlarda gender münasibətləri, şəxsiyyətin inkişafı, mədəniyyət və incəsənətlə bağlı mühazirələrlə çıxış edib. Saçidanand Coşi çıxışları “Mera Desh Mera Dharm” (Mənim ölkəm, mənim dinim) adlı iki cilddə toplanıb.

Hindistanın tanınmış alimi ədəbiyyat və mədəniyyət sahəsində xidmətlərinə görə ölkə səviyyəsində bir sıra nüfuzlu mükafatlara layiq görülüb. O, eyni zamanda Hindistanın Art və Mədəni İrs Milli Etibarı (İNTACH), Nehru Memorial Muzeyi və Kitabxanası (NMML), Universitet  Qrant Komissiyasının (UGC) ömürlük üzvüdür.

Xalqları bir-birinə yaxınlaşdıran, dost edən, adətən onların ədəbiyyatı, mədəniyyətidir. Bu baxımdan hindistanlı alimin Nizami Gəncəvi yaradıcılığına sevgisi təsadüfi deyil. Bildiyimiz kimi, Azərbaycanın dahi şairləri Nizami Gəncəvi və Əfzələddin Xaqani Şirvani  əsərlərinin bəzi hissəsini Hindistana həsr ediblər. Nizami Gəncəvinin “Yeddi gözəl” əsərində hind şahzadəsi Furakin hekayəti, “İskəndərnamə” əsərinin hər iki hissəsində - “Şərəfnamə” və “İqbalnamə”də Hindistandan bəhs etməsi, Əfzələddin Xaqani Şirvaninin Hindistana “Şiniyyə” adlı gözəl poema həsr etməsi və daha çox belə nümunələri göstərmək olar. Görkəmli hind şairi Əmir Xosrov Dəhləvinin Nizami “Xəmsə”sindən ruhlanaraq “Pənc gənc” (“Beş Xəzinə”) əsərini yazdığıda məlumdur.

Saçidanand Coşinin Nizami Muzeyinin ekspozisiyasında Azərbaycan ədəbiyyatının klassikləri, xüsusən  İmadəddin Nəsimi yaradıcılığı ilə tanışlıq  maraqlı oldu. Təbii ki, bu marağın, təəssüratın yaranması muzeyin Məktəblərlə və ictimaiyyətlə iş şöbəsinin kiçik elmi işçisi Nəzrin Yusifovanın qonaqpərvərliyi sayəsində olub. Çoxəsrlik ədəbiyyatı, mənəvi dəyərləri əks etdirən ekspozisiyanı ziyarətçiyə təlqin və təqdim etmək də muzey əməkdaşının müsbətlərindəndir.

2011-ci ildə Hindistanın paytaxtı Dehlidə dahi Azərbaycan şairi Nizami Gəncəvinin 870 illik yubileyinə həsr olunmuş beynəlxalq konfrans keçirilib və vaxtaşırı müxtəlif tədbirlər təşkil olunub. Səmimi söhbət zamanı belə tədbirləri xatırlayan  Saçidanand Coşi  Nizami Gəncəviyə həsr olunmuş tədbirlərin birində Hindistanın görkəmli insanları ilə birgə çəkilmiş fotosunu əməkdaşımızla bölüşüb.

Sonda hindistanlı alim muzeyin “Rəy kitabı”na belə bir muzeyi ziyarət etməsinin gözəl təcrübə olduğunu və muzey tərəfindən sənət əsərlərinin nəsillər boyu mühafizəsinin  xoş təsir bağışladığını qeyd edib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.