Azərbaycan Milli Elmlər Akademiyası

BMT-nin İqlim Dəyişmələri üzrə Konvensiyasının Tərəflər Konfransının 29-cu sessiyasında (COP29) iştirak edən filippinli Ancela Konsuela İbay ətraf mühitin qorunması, iqlim dəyişikliyi üzrə ekspert və vəkildir. O, Flippin İqlim dəyişikliyi Enerji proqramının rəhbəri, “Earth hour” Filippin adaları üzrə direktordur.

Nizami Gəncəvi adına Milli Azərbaycan Ədəbiyyatı Muzeyinin ekspozisiyası ilə tanış olan Ancela Konsuelaya  Azərbaycanın şairə qadınları ilə bağlı məlumatlar  maraqlı olub.

Muzeyin kiçik elmi işçisi Humay Qasımzadə  qonağa ekspozisiyanı təqdim edərək Azərbaycan intibahının görkəmli nümayəndəsi, mübariz ruhlu şairə Məhsəti Gəncəvinin həyat və yaradıcılığından bəhs edib. Orta əsrlərdə qadın azadlığının carçısı kimi şairənin rolunu yüksək qiymətləndirib. Həmçinin, Ancela Konsuela XVIII əsrdə yaşamış Heyran xanım Dümbülü, XIX əsrin görkəmli şairəsi Xurşidbanu Natəvan, 1937-ci il repressiya və mühacir dövr Azərbaycan qadını və digərlərinin həyat və yaradıcılığı ilə tanış olub.

Sonda ziyarət zamanı onu maraqlandıran suallara cavab alan Ancela Konsuela muzeyin rəylər və təəssüratlar kitabına Azərbaycanın ədəbiyyatı, mədəniyyəti, tarixi haqqında çox şey öyrəndiyini yazıb. O, Filippinə qayıdarkən Azərbaycandan çox gözəl xatirələr aparacağını deyib, bir gün ailəsi ilə birlikdə yenidən ölkəmizi ziyarət edəcəyini bildirib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.