Azərbaycan Milli Elmlər Akademiyası

AMEA-nın Rəyasət Heyətinin həftəlik mətbu orqanı olan “Elm” qəzetinin 2025-ci ilin yanvar ayında ilk sayı çapdan çıxıb.

Qəzetin ön səhifəsində Azərbaycan Respublikasında 2025-ci ilin “Konstitusiya və Suverenlik İli” elan edilməsi və “Dövlət büdcəsindən maliyyələşən bir sıra təşkilatlarda çalışan işçilərin əməkhaqlarının artırılması haqqında” Prezident İlham Əliyevin sərəncamları yer alıb.

Bugünkü sayda, akademik İsa Həbibbəylinin Türkiyə Elmlər Akademiyasının fəxri üzvü seçilməsi münasibətilə TÜBA-nın prezidenti professor Müzəffər Şəkər tərəfindən AMEA prezidentinə göndərilən təbrik məktubu, akademik İsa Həbibbəylinin Şota Rustaveli adına Gürcü Ədəbiyyatı İnstitutunun keçirdiyi tədbirdə çıxışı və AMEA-nın Rəyasət Heyətinin 2025-ci ildə ilk iclasına dair yazılar təqdim edilib.

“Elm” qəzetinin 10 yanvar nömrəsində AMEA-nın vitse-prezidenti akademik İradə Hüseynovanın müəllifi olduğu “Elm və əməkdaşlıq dünyanı xilas edəcək” adlı məqalə, “İlin elmi yekunları” rubrikası altında Fizika-Riyaziyyat və Texnika Elmləri Bölməsi və İctimai Elmlər Bölməsinin mühüm elmi nəticələrinə dair hesabat yazıları və digər informasiyalar dərc edilib.

Bundan başqa, qəzetin bugünkü buraxılışında akademik Cavad Abdinovun 85 illik  və  AMEA-nın vitse-prezidenti akademik Dilqəm Tağıyevin 75 illik yubileyləri ilə bağlı məqalələr, eləcə də “Məzhər üt-tüki” - Azərbaycan türkcəsinə məhəbbətlə” və “Qərbi Azərbaycan abidələri: Şor bulaq” adlı məqalələr təqdim olunub.

Qəzetin rus və ingilis dili bölməsində AMEA prezidenti akademik İsa Həbibbəylinin iştirakı ilə keçirilən tədbirlərlə bağlı icmallar və “Elm” qəzetinin baş redaktoru, filologiya üzrə fəlsəfə doktoru Ağahüseyn Şükürovun Almaniyanın Karlsruhe Texnologiya İnstitutunun professoru, Beynəlxalq Elmi Şuranın ilk katibi olmuş professor Alik İsmayılzadə ilə müsahibəsi və digər xəbərlər yer alıb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.