Azərbaycan Milli Elmlər Akademiyası

Aprelin 2-də AMEA-nın Məhəmməd Füzuli adına Əlyazmalar İnstitutunda Akademiyanın müəssisələrində elmin populyarlaşdırılması istiqamətində keçirilən tədbirlər çərçivəsində institutun Əlyazmaların və əski çap kitablarının tərcüməsi şöbəsinin baş elmi işçisi fəl.e.d., dosent Zəkiyyə Əbilova “Avtoqraf nüsxə” mövzusunda mühazirə oxuyub.

Bakı Dövlət Universiteti, Bakı Slavyan Universiteti, Odlar Yurdu və Bakı Avrasiya Universitetlərinin tələbələrinin iştirak etdiyi təlimdə alim Məhəmməd Füzuli, Mir Möhsün Nəvvab, Abbasqulu ağa Bakıxanov kimi dahi şair və yazıçılarımızdan söz açıb, onların ərəbdilli və farsdilli əsərlərinin (“Hədiqətüs-süəda”, “Riyazül-qüds”, M.M.Nəvvab “Divan”ının avtoqraf nüsxəsi və s.) institutumuzda qorunub saxlanılan çap və əlyazma nüsxələrindən bəhs edərək nümunələr göstərib. Məruzə iştirakçılar tərəfindən maraqla qarşılanıb, verilən suallar cavablandırılıb.

Xatırladaq ki, doktorant və dissertantların müvafiq fənlər üzrə ixtisas səviyyələrinin artırılması və gücləndirilməsi məqsədilə institutun Təhsil şöbəsi tərəfindən təşkil olunmuş bu kimi seminarların iyun ayına qədər davam etdirilməsi nəzərdə tutulub.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.