Azərbaycan Milli Elmlər Akademiyası

Aprelin 2-də AMEA-nın Lənkəran Regional Elmi Mərkəzinin Elmi şurasının iclası keçirilib.

Tədbir iştirakçıları əvvəl mərkəzin foyesində şəhid Mahsun Bağırzadənin xatirə guşəsinin önünə tər çiçəkləri düzüblər.

Sonra 31 Mart - Azərbaycanlıların Soyqırımı qurbanlarının və bütün şəhidlərimizin ruhu bir dəqiqəlik sükutla yad edilib.

İclası giriş sözü ilə açan Lənkəran REM-in direktoru, Elmi şuranın sədri Mehman Qaraxan oğlu Əliyev şura üzvlərini və iştirakçıları gündəliklə tanış edib.

Elmi şurada ”AMEA Lənkəran REM-in 2025-ci ildəki elmi və elmi-təşkilati fəaliyyəti yeni reallıqlar və çağırışlar kontekstində” (filologiya üzrə fəlsəfə doktoru Mehman Əliyev),  “Elmi şuranın tərkibinin təsdiqi”, “Lənkəran REM-in “Elmi əsərləri” (İctimai-humanitar və təbiət elmləri seriyası) adlı elmi jurnalın redaksiya heyətinin təsdiq olunması” (biologiya üzrə fəlsəfə doktoru, dosent Sevinc Hüseynova), “AMEA-nın 80 illik yubileyinin keçirilməsi ilə əlaqədar tədbirlər planının təqdim olunması” (tarix üzrə fəlsəfə doktoru Cəmil Quliyev) mövzularında məsələlər müzakirə olunub.

Gündəlik yetərsay olduğuna görə təsdiq edilib.

Birinci məsələ barəsində məlumat verən Lənkəran REM-in direktoru Mehman Əliyev bildirib ki, 2024-cü ildə elm sahəsində qəbul edilən normativ-hüquqi aktlar, Azərbaycan Respublikası Prezidentinin Fərman və sərəncamları, habelə dövlət proqramlarının həyata keçirilməsi ilə əlaqədar mərkəzdə 35 tədbir keçirilib. Onlardan 2-si konfrans, digərləri isə elmi seminarlardır. Hesabat ilində 59 tezis və məqalə (31 tezis, 28 məqalə) çap olunmuşdur. Onlardan 14 məqalə və 7 tezis xaricdə, 24 tezis, 14 məqalə isə respublikada çap olunmuşdur. Mühüm elmi nəticələr də vardır.

Elmi şuranın sədri əlavə edib ki, mərkəzin 7 dekabr 2024-cü il tarixində keçirilən hesabat iclasında AMEA prezidenti akademik İsa Həbibbəyli, vitse-prezidentlər akademik İradə Hüseynova, akademik Arif Həşimov, Rəyasət Heyəti aparatının şöbə müdiri f.ü.f.d. dos. Ağahüseyn Şükürov və digər əməkdaşların iştirakı bizə göstərilən etimadın bariz nümunəsi olmaqla yanaşı, həm də qarşımıza böyük məsuliyyət qoyur. AMEA rəhbərinin iclasda çıxışı zamanı söylədiyi “Ana xəttimiz dövlətçilik, Heydər Əliyevçilik, Azərbaycançılıqdır! Heydər Əliyev elə Azərbaycançılıq deməkdir. Azərbaycançılıq bizi birləşdirən dəyərdir. O, bizim bütövlüyümüzü göstərən dəyərdir. O, bizim elmimizin fəlsəfəsidir, ana istiqamətidir. Sizin də, bizim də istiqamətimiz bundan ibarətdir”, - sözləri Lənkəran REM-in obrazlı desək, yol xəritəsidir.

2025-ci ilin birinci rübündə mərkəzin əməkdaşları tərəfindən aparılan elmi-tədqiqat işlərinin uğurla davam etdirildiyini vurğulayan Mehman Əliyev diqqətə çatdırıb ki, Azərbaycanın cənub-şərq regionunda folklorun, yazılı ədəbiyyat nümunələrinin öyrənilməsi, etnoqrafik, arxeoloji və numizmatik abidələrin aşkarlanması, onların xəritələrinin tərtibi, numizmatik materialların elmi dövriyyəyə daxil edilməsi, kataloqlaşdırılması istiqamətində irəliyə doğru mühüm addımlar atılır. Eyni zamanda, Lənkəran-Astara bölgəsində çay, sitrus və subtropik bitkilərin mövcud sort və formalarının toplanmasına, morfoloji, bioloji təsərrüfat xüsusiyyətlərinə, onların məhv olmaq təhlükəsindən qorunmasına, bərpa edilməsinə, müasir seleksiya baxımından qiymətləndirilməsinə, yeni sortların seçilməsi və yaradılmasına, Cənub regionunda uzunömürlülüyün populyativ, sosial-bioloji xüsusiyyətləri, ekoloji və genetik faktorların, yaşla bağlı patoloji dəyişikliklərin intensivliyinin öyrənilməsinə diqqət artırılır. Qeyd edilən istiqamətlər üzrə elmi-tədqiqatlar 3 problem, 9 mövzu, 10 iş və 10 mərhələ əsasında aparılır.

Daha sonra Sevinc Hüseynova Elmi şuranın yeni tərkibi və Lənkəran REM-in “Elmi əsərləri” jurnalının redaksiya heyəti ilə iştirakçıları tanış edib, Cəmil Quliyev AMEA-nın 80 illik yubileyinin keçirilməsi ilə əlaqədar tədbirlər planını diqqətə çatdırıb.

Elmi şuranın üzvlərindən LDU-nun müəllimləri f.ü.f.d. dos. Əlirza Əliyev, f.ü.f.d. dos. Qədim Rufullayev, tex.ü.f.d. İltifat Kərimov, a.ü.f.d. dos. Xalıqverdi Babayev, t.ü.f.d. Mayis Cəfərov, Aqil Həsənov, İsaq Məmmədov, a.ü.f.d. Ceyhun Qasımov və Sərraf Talıbov müzakirə edilən məsələlərlə bağlı mülahizələrini bölüşüb, təkliflərini irəli sürüblər.

Elmi şuranı yekunlaşdıran Mehman Əliyev qarşıya qoyulan vəzifələrin ilin sonunadək layiqincə yerinə yetirilməsi üçün bütün imkanlardan daha səmərəli istifadə olunacağına əminlik ifadə edib, iştirakçılara minnətdarlığını bildirib.

Sonda müvafiq qərar qəbul olunub.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.