Azərbaycan Milli Elmlər Akademiyası

Ölkə başçısının “Azərbaycan Milli Elmlər Akademiyasının 80 illiyinin qeyd edilməsi haqqında” 2025-ci il 18 mart tarixli Sərəncamının bu əlamətdar tarixi hadisə ilə bağlı alimlərimizin və elmi müəssisələrin qarşısında qoyduğu vəzifələrin yerinə yetirilməsi üzrə aparılan tədbirlər çərçivəsində AMEA-nın Gəncə Bölməsində “Nizami Gəncəvi yubileyləri: Ulu Öndər Heydər Əliyevdən möhtərəm Prezidentimiz İlham Əliyevə” adlı monoqrafiya çapa hazırlanır.

Layihə rəhbəri bölmənin sədri akademik Fuad Əliyev olan kitabın fəsillərində əhatə edilmiş mövzular və onların elmi əhəmiyyəti bu elm ocağında keçirilən seminarda müzakirə edilib.

Monoqrafiyanın müəllifi, AMEA-nın Gəncə Bölməsinin elmi işlər üzrə sədr müavini filologiya üzrə fəlsəfə doktoru Əlimuxtar Muxtarov seminarda yeni hazırlanan kitabın yazılmasının elmi zərurəti haqda danışıb. O, dahi mütəfəkkirimiz Nizami Gəncəvi ilə bağlı əlamətdar tarixlərin qeyd olunmasının əsrləri əhatə edən salnaməsinin sistemləşdirilməsinin və bu mövzunun hər bir dövrün xüsusiyyətlərini nəzərə alaraq elmi şərhinin vacibliyini qeyd edib.

Ə.Muxtarov vurğulayıb ki, kitabın əsas konsepsiyasını dahi şairin fəlsəfi dünyasının milli, eləcə də ümumbəşəri mahiyyətinin təbliği yönündə Ulu Öndər Heydər Əliyevin gələcəyə ünvanlanmış strategiyasının, həmçinin onun layiqli davamçısı, Prezident İlham Əliyevin  ölkəmizin qüdrət və nüfuzunun beynəlxalq aləmdə daha da yüksəldilməsi naminə yorulmaz fəaliyyətinin bir amili kimi  böyük Nizaminin  müasir dövr üçün də olduqca aktual olan çağırışlarının bütün dünyaya çatdırılmasının əhəmiyyətinin aydınlaşdırılması təşkil edir.

Məruzəçi 450 səhifədən çox olacaq bu kitabın ilkin variantda “Əsrlərdən gələn Nizami Gəncəvi sədası”, “1941-ci ilin payızında mühasirəli Leninqradda yaşanan 800 yaşlı Nizami Gəncəvi təntənəsi”, “Nizami Gəncəvi elə bir dahi sənətkardır ki, onun yubileyi hər il qeyd edilməlidir”, “Müstəqil Azərbaycanın İlham Əliyev erası”, “Azərbaycan nizamişünaslığının İlham Əliyevlə başlayan inkişaf mərhələləri”, “Azərbaycandan müasir dünyaya Nizami Gəncəvi çağırışı” adlı fəsilləri əhatə etdiyini bildirib.

Sonra seminarın iştirakçıları onları maraqlandıran məsələlər haqda öz fikir və təkliflərini bildiriblər.

Tədbiri yekunlaşdıran bölmənin sədri akademik Fuad Əliyev kitabda Nizami Gəncəvinin ən son  yubiley tədbirləri ilə bağlı, xüsusən Gəncədə aparılan işlərin tarixi miqyasının, o cümlədən Beynəlxalq Nizami Gəncəvi Mərkəzinin fəaliyyətinin daha dolğun əks olunmasının vacibliyini qeyd edib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.