Azərbaycan Milli Elmlər Akademiyası

“Rəqəmsal kriminalistika sahəsində araşdırmaların aparılması və kadrların hazırlanması kibercinayətkarlıqla mübarizə baxımından ən əhəmiyyətli məsələlərdəndir”.

Bu fikirləri AMEA-nın vitse-prezidenti, ETN İnformasiya Texnologiyaları İnstitutunun baş direktoru, akademik Rasim Əliquliyev institutda keçirilən elmi seminarda çıxışı zamanı səsləndirib. Son illər Azərbaycanda sosial-iqtisadi inkişafa nail olunması üçün kompleks tədbirlərin həyata keçirildiyini bildirən akademik R.Əliquliyev, ölkəmizdə artıq süni intellekt ideyalarının gerçəkləşməsi, rəqəmsal dövlətin formalaşması və s. amillərin kibertəhlükələrin reallaşması üçün də zəmin yaratdığını diqqətə çatdırıb.

Alim ölkə rəhbərliyi tərəfindən kibertəhlükəsizlik məsələlərinə böyük diqqət ayrıldığını bildirərək bu istiqamətdə həyata keçirilən vacib tədbirləri diqqətə çatdırıb. AMEA-nın vitse-prezidenti bu istiqamətdə dövlət başçısı tərəfindən təsdiq edilmiş “İnformasiya təhlükəsizliyi və kibertəhlükəsizliyə dair 2023-2027-ci illər üzrə strategiya”, eləcə də digər dövlət əhəmiyyətli sənədlərin icrasının kibertəhlükəsizlik problemlərinin həlli baxımından önəmini qeyd edib, bu sənədlərin müvafiq dövlət qurumları, eyni zamanda ölkənin alim və mütəxəssislərinin qarşısında mühüm vəzifələr qoyduğunu vurğulayıb.  

Baş direktor Azərbaycanda iqtisadiyyatın rəqəmsallaşdırılmasının ölkənin kiberimmunitetinin gücləndirilməsi və kibertəhlükəsizlik sahəsində milli səviyyədə vahid siyasətin formalaşdırılması zərurəti yaratdığını qeyd edib. Kibercinayətkarlar tərəfindən törədilən müxtəlif xarakterli kiberinsidentlərin qarşısının alınmasında ölkənin müvafiq qurumlarının səmərəli fəaliyyət göstərdiyini vurğulayıb.

“Son zamanlar kiberməkanda bədniyyətli insidentlərin dinamikasında artım müşahidə olunmaqdadır”, - deyən akademik R.Əliquliyev vətəndaşların bank kartları ilə bağlı kibercinayətkarlıq hallarının sayının artmasının ciddi sosial problemə çevrildiyini, insanları psixoloji manipulyasiya etməklə onların məlumatlarının ələ keçirilməsi hallarına tez-tez rast gəlindiyini bildirib.

AMEA-nın vitse-prezidenti hazırda ölkəmizdə kibercinayətkarlığa qarşı mübarizənin gücləndirilməsi və onun səmərəliliyinin artırılması istiqamətində kompleks işlərin həyata keçirildiyini qeyd edib. Alimin sözlərinə görə, Azərbaycanda peşəkar kriminalistlərin fəaliyyət göstərməsinə baxmayaraq, virtual məkanda kibercinayətkarlıq hallarının araşdırılması və səbəblərinin müəyyənləşdirilməsi baxımından rəqəmsal kriminalistika sahəsində yüksəkixtisaslı kadrların yetişidirilməsinə, bu istiqamətdə mövcud problemlərin araşdırılmasına, ölkəmizin kibertəhlükəsizliyinin gücləndirilməsinə ehtiyac vardır.

Baş direktor İnformasiya Texnologiyaları İnstitutunda artıq uzun illərdir ki, informasiya təhlükəsizliyinin müxtəlif aspektləri ilə bağlı araşdırmaların aparıldığını vurğulayıb. Əlavə edib ki, son zamanlar institutda kiberinsidentlərin qeydə alınması, onların süni intellekt texnologiyalarının tətbiqi ilə müxtəlif parametrlər üzrə dərin analiz olunması və s. ilə bağlı tədqiqatlara başlanılmışdır.

Akademikin sözlərinə görə, hazırda institutun qarşısında duran əsas vəzifələrdən biri də kiberməkanda baş vermiş anomal halların rəqəmsal ekspertizasının aparılması, yüksək səmərəliliyə malik intellektual kriminalistik metod və alqoritmlərin işlənilməsidir.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.