Azərbaycan Milli Elmlər Akademiyası

AMEA-nın Azad Həmkarlar İttifaqının (AHİ) Rəyasət Heyətinin növbəti iclası keçirilib.

İclası giriş sözü ilə Azad Həmkarlar İttifaqının sədri s.e.ü.f.d., dosent Sənan Həsənov iştirakçıları gündəlikdəki məsələlərlə tanış edib.

O, tədbirin Azərbaycan Respublikası Prezidentinin “Azərbaycan Milli Elmlər Akademiyasının 80 illiyinin qeyd edilməsi haqqında” 18 mart 2025-ci il tarixli Sərəncamının icrası ilə bağlı AHİ qarşısında duran vəzifələrə həsr olunduğunu bildirib.

Bu il martın 27-də AMEA-nın yaradılmasının 80 illiyinin tamam olduğunu söyləyən dosent Sənan Həsənov Akademiyanın tarixinə nəzər salıb, Elm Günü münasibətilə AHİ Rəyasət Heyətinin üzvlərini təbrik edib. O, dövlət başçısının sözügedən Sərəncamının Azərbaycan elminə, Azərbaycan aliminə, Akademiyaya, ölkəmizin intellektual təbəqəsinə verilən ən yüksək qiymətin ifadəsi olduğunu vurğulayıb. Qeyd edib ki, Azərbaycan Milli Elmlər akademiyası hər zaman həm Ulu Öndər Heydər Əliyevin, eləcə də Prezident İlham Əliyevin diqqət və qayğısı ilə əhatə olunubdur.

AHİ sədri Azərbaycan Milli Elmlər Akademiyasının 80 illiyi çərçivəsində Bakıda və AMEA-nın elmi bölmələri və mərkəzlərinin fəaliyyət göstərdiyi regionlarda silsilə tədbirlərin keçiriləcəyini, Azərbaycan elminin keçdiyi şərəfli tarixi yolun, Akademiyanın fəaliyyət istiqamətlərinin, müxtəlif sahələrə verdiyi töhfələrin, eləcə də bu elm ocağında son illər əldə olunan nailiyyətlərin geniş ictimaiyyətə çatdırılacağını söyləyib.

Sənan Həsənov AMEA-nın 80 illiyi ilə bağlı Rəyasət Heyətində, institutlarda, eləcə də Akademiyanın digər qurumlarında təşkil ediləcək tədbirlərdə Azad Həmkarlar İttifaqının üzərinə düşən vəzifələrdən bəhs edib, bu istiqamətdə müvafiq tapşırıqlar verib.

Sonda AMEA-nın 80 illiyinin yüksək səviyyədə təşkili ilə bağlı görüləcək işlər müzakirə olunub, bir sıra təkliflər irəli sürülüb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.