Azərbaycan Milli Elmlər Akademiyası

ETN Geologiya və Geofizika İnstitutunda Elmi şuranın  növbəti iclası keçirilib.

Gündəlik səsə qoyulub təsdiq edildikdən sonra iclasın sədri Geologiya və Geofizika İnstitutunun direktoru akademik Akif Əlizadə “Böyük və Kiçik Qafqazın ön çökəkliklərinin maykop dəstəsi  karbohidrogen sistemlərinin müqayisəsi” məruzəsi üçün sözü AMEA müxbir üzvü Elmira Əliyevaya verib.

E.Əliyeva bildirib ki, sözügedən mövzuda aparılan tədqiqatlarda məqsəd Böyük və Kiçik Qafqazın ön çökəkliklərindəki neft sistemlərinin fərqlərinin səbəblərini aşkar etmək olub. Bu məqsəsdlə Orta Kür çökəkliyi daxilində Maykop çöküntüləri, Kür-Xəzər meqahövzəsinin müxtəlif hissələrində, Yevlax-Ağcabədi çökəkliyində, Gəncə və Muradxanlı NQR-in geniş bir hissəsində və digər tədqiqat obyektlərində qum laylarının mövcudluğu, üzvi maddələrin karbohidrogenlərə çevrilməsi üçün əlverişli termodinamik şərait, orqanik maddənin kifayət qədər katagenetik yetkinliyi təhlil edilib və müvafiq elmi nəticələr əldə edilib. Məruzə ətrafında Elmi şura üzvlərinin çıxışları olub, həmçinin çoxsaylı suallar cavablandırılıb. 

Akademik Akif Əlizadə “Azərbaycanın tibbi-geoloji atlası”nın hazırlanmasının vəziyyəti haqqında Geologiya və Geofizika İnstitutu, Coğrafiya İnstitutu, Azərbaycan Tibb Universiteti, Milli Onkologiya Mərkəzi və Səhiyyə Nazirliyinin İctimai Səhiyyə və İslahatlar Mərkəzi mütəxəssislərinin birgə səyi ilə hazırlanacaq nəşr barədə geniş məlumat təqdim edib, iştirakçıların yeni nəşrlə bağlı  suallarını cavablandırıb.

Sonra Milli  Məlumat  Mərkəzində (CTBTO) yerinə yetirilən işlərin gedişatı barədə y.e.ü.f.d. Rafiq Səfərovun, Dissertasiya şurasının fəaliyyəti haqqında  t.e.ü.f.d. Dilguşa Mirzəyevanın, Mütəxəssislər şurası – Kollokviumun fəaliyyəti haqqında Səadət  Ələkbərovanın, “Geoservice GGİ” Məhdud Məsuliyyətli Cəmiyyətin fəaliyyəti ilə bağlı g.-m.e.n. Samir Məmmədovun məlumatları dinlənilib.

İctimaiyyətlə əlaqələr şöbəsinin rəhbəri Şirməmməd Nəzərli elmin populyarlaşdırılması, təbliği və təşviqi istiqamətində Geologiya və Geofizika İnstitutunun fəaliyyəti haqqında hesabat təqdim edib. Həmçinin bildirib: “Akademik Akif Əlizadənin layihə təhbəri olduğu “Elmin cazibəsi” seriyasının son 5 ildə 4 cildi işıq üzü görüb. Bu il 5-ci kitab RF Dubna şəhərindəki Birləşmiş Nüvə Tədqiqatları İnstitutunda (BNTİ) elmi fəaliyyət göstərən azərbaycanlı alimlərə həsr edilib. Əsər elə həmin institutun nəşriyyat şöbəsində bizim iştirakımızla çapa hazırlanaraq bu yaxınlarda  oxuculara təqdim edilib. Birləşmiş Nüvə Tədqiqatları İnstitutu elmi şurasının 138-ci sessiyasında “Elmin cazibəsi 5” kitabının təqdimat mərasimi reallaşıb. Təqdimatda kitab haqqında çıxışlar olub, Nüvə  Tədqiqatları İnstitutunun baş elmi katibi Sergey Nedelko və Nüvə problemləri laboratoriyasının direktoru Yevgeniy Yakuşev kitab haqqında yüksək fikirlər səsləndiriblər. Bildirilib ki, BNTİ-də fəaliyyət göstərən digər milli icmaların da  bu cür nəşr hazırlaması çox arzuolunandır.”

Sonda bir sıra cari məsələlərə baxılıb. 

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.