Azərbaycan Milli Elmlər Akademiyası

AMEA Dilçilik İnstitutunun əməkdaşları Özbəkistanda keçirilən MSBC–2026 beynəlxalq konfransında iştirak ediblər.

Beynəlxalq konfransda institutun Süni intellekt və kompüter dilçiliyi şöbəsinin əməkdaşları – filologiya elmləri doktoru, professor Məsud Mahmudov, filologiya elmləri doktoru, dosent Nərmin Əliyeva, filologiya üzrə fəlsəfə doktoru, dosent Könül Həbibova və şöbənin böyük elmi işçisi Maya Heydərova iştirak ediblər.

İki ildən bir təşkil olunan beynəlxalq elmi forum  23–25 sentyabr 2026-cı il tarixlərində Özbəkistan Milli Universitetinin Kompüter dilçiliyi və tətbiqi dilçilik kafedrasının təşəbbüsü ilə keçirilib.

Konfrans Litva Əməliyyat Tədqiqatları Cəmiyyəti (LITORS), Əl-Fərabi adına Qazaxıstan Milli Universiteti, Turan Universiteti, Narxoz Universiteti (Qazaxıstan), Hamburq Tətbiqi Elmlər Universiteti (HAW Hamburg, Almaniya), Arkanzas Universitetinin Litl-Rok kampusu (ABŞ), Klaypeda Universiteti və Vitautas Maqnus Universiteti (Litva) ilə əməkdaşlıq çərçivəsində təşkil olunub. Elmi tədbir, həmçinin Avropa Əməliyyat Tədqiqatları Cəmiyyətləri Assosiasiyasının (EURO) və “Science and Innovation” beynəlxalq elmi jurnalının dəstəyi ilə keçirilib.

Nüfuzlu elmi forumda Avropa ölkələri ilə yanaşı, Çin, Azərbaycan, Yunanıstan, Litva, Almaniya, Avstraliya, Hindistan, Gürcüstan, Türkiyə, Rusiya və Qazaxıstanın aparıcı ali təhsil müəssisələri və elmi-tədqiqat mərkəzlərini təmsil edən tanınmış alimlər və gənc tədqiqatçılar iştirak ediblər.

Konfrans çərçivəsində plenar və bölmə iclaslarında süni intellekt və böyük dil modelləri (LLM), təbii dilin emalı (NLP) və dil texnologiyaları, sosial-davranış hadisələrinin modelləşdirilməsi və rəqəmsal əkizlər (Digital Twins), iqtisadi sistem modellərinin və oyunlar nəzəriyyəsinin tətbiqi, regional tədqiqatlar, davamlı inkişaf və təhsil texnologiyaları kimi aktual elmi istiqamətlər üzrə məruzələr dinlənilib və müzakirələr aparılıb.

MSBC–2026 konfransı müxtəlif ölkələrdən olan alimlərin elmi əlaqələrinin genişləndirilməsi, müasir süni intellekt və dil texnologiyaları sahəsində aparılan tədqiqatların nəticələrinin müzakirəsi, eləcə də beynəlxalq elmi əməkdaşlıq üçün yeni imkanların müəyyənləşdirilməsi baxımından mühüm platforma rolunu oynayıb.

Konfransın diqqətçəkən cəhətlərindən biri də iştirakçıların seçilmiş elmi tədqiqat nəticələri və məqalələrinin beynəlxalq elmi nəşr platforması olan Springer vasitəsilə nəşrinin nəzərdə tutulmasıdır.

Konfransın təşkilati məsələlərində yaxından iştirak edən AMEA-nın İ.Nəsimi adına Dilçilik İnstitutunun Süni intellekt və kompüter dilçiliyi şöbəsinin aparıcı elmi işçisi, filologiya üzrə fəlsəfə doktoru, dosent Könül Həbibova səfər çərçivəsində M.Uluqbek adına Özbəkistan Milli Universitetində kompüter dilçiliyi ixtisası üzrə təhsil alan magistrlərə ustad dərsi keçib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.