Azərbaycan Milli Elmlər Akademiyası

Radiasiya Problemləri İnstitutunda 27 sentyabr - Anım Gününə həsr olunmuş tədbir keçirilib.

İnstitutun bütün kollektivinin iştirak etdiyi tədbirdə əvvəlcə Azərbaycanın Dövlət Himni səsləndirilib və ölkəmizin suverenliyi və ərazilərimizin bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.

İnstitutun baş direktoru AMEA-nın müxbir üzvü İslam Mustafayev çıxış edərək bildirib ki, 27 sentyabr doğma torpaqlarımızı işğaldan azad etmək, ölkəmizin sərhədlərini təxribatlardan qurtarmaq, hərbi gücümüzün qətiyyətlə ortaya qoyulduğu milli ruhumuzun, milli həmrəyliyimizin öz sözünü kəskinliklə dediyi şərəfli bir tarixdir.

Daha sonra institutun icraçı direktoru f.-r.e.n., dosent Rəvan Mehdiyeva 44 günlük Vətən müharibəsində qüdrəti Azərbaycan Ordusunun yazdığı qəhrəmanlıqlardan danışıb, əsgər və zabitlərimizin suverenliyimiz və ərazi bütövlüyümüz uğrunda göstərdiyi şücaətə görə qürur duyduğunu bildirib.

27 sentyabr - Vətən müharibəsinin başlanma tarixi və möhtəşəm Qələbə tariximizdir. Azərbaycan öz coğrafiyası üçün xain əllərin cızdığı bütün məkrli planları beləcə alt-üst etdi, torpaqlarına sahib çıxdı, dəyişdirilmiş toponimlərə doğma, əsl adını geri qazandırdı.

Azərbaycan bu gün qalib xalq kimi yaşayır, bundan sonra da qalib dövlət və müzəffər xalq kimi əbədi yaşayacaq.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.