Azərbaycan Milli Elmlər Akademiyası

Müasir Azərbaycan tənqidinin görkəmli nümayəndəsi Nizami Gəncəvi adına Ədəbiyyat İnstitutunun Müstəqillik dövrü Azərbaycan ədəbiyyatı şöbəsinin müdiri, AMEA-nın müxbir üzvü Tehran Mustafayevin 65 yaşı tamam olur.

Mustafayev Tehran Əlişan oğlu 1960-cı il yanvar ayının 16-da Bakı şəhərində anadan olub. O, 1978-1983-cü illərdə Azərbaycan Dövlət Universitetinin (indiki Bakı Dövlət Universiteti) Filologiya fakültəsində təhsil alıb. 1983-1989-cu illərdə orta məktəb müəllimi işləyib, 1985-1989-cu illərdə Nizami Gəncəvi adına Ədəbiyyat İnstitutunun aspiranturasında təhsilini davam etdirib, 1989-2006-cı illərdə isə həmin müəssisədə elmi işçi kimi fəaliyyət göstərib. Alim 1994-1996-cı illərdə Futurologiya İnstitutunda ali məktəb müəllimi işləyib. Eyni zamanda, 1996-2004-cü illərdə Azərbaycan Yazıçılar Birliyinin “Ədəbiyyat qəzeti”ndə baş redaktorun müavini olub.

O, 2015-ci ildən AMEA-nın Nizami Gəncəvi adına Ədəbiyyat İnstitutunun Müstəqillik dövrü Azərbaycan ədəbiyyatı şöbəsinə rəhbərlik edir. 2001-ci ildən bugünədək Bakı Slavyan Universitetinin Filologiya fakültəsində ali məktəb müəllimi kimi çalışır. Tehran Mustafayev, həmçinin "Tənqid.net" jurnalının (2006) təsisçisi və baş redaktorudur.

Tehran Mustafayev 1990-cı ildə "Azərbaycan sovet ədəbi tənqidinin üslubları (1960-1980-ci illər)" mövzusunda namizədlik, 2005-ci ildə "XX əsr Azərbaycan nəsrinin poetikası" mövzusunda doktorluq dissertasiyalarını müdafiə edib, 2015-ci ildə professor elmi adını alıb. O, 2017-ci ildə isə "Ədəbiyyatşünaslıq" ixtisası üzrə AMEA-nın müxbir üzvü seçilib.

Alimin tədqiqat obyekti əsasən XX əsr və müstəqillik dövrü Azərbaycan ədəbiyyatı, onların elmi-nəzəri və tənqidi problemləri ilə bağlıdır. Onun tərəfindən XX əsr Azərbaycan nəsrinin tipologiyası və poetikası sistemli şəkildə araşdırılıb, ilk dəfə olaraq milli nəsr bütövlükdə - təşəkkülü, inkişaf tendensiyaları, üslub və təmayülləri ilə dünya ədəbiyyatı kontekstində təhlil edilib. Bundan əlavə, ədəbiyyatşünas alim tərəfindən müstəqillik dövrü Azərbaycan ədəbiyyatının təşəkkülü, inkişafı, müasir dünyaya inteqrasiya problemləri öyrənilib, təsnifat və səciyyəsi verilib.

Alim 1981-ci ildən mətbuatda ədəbi-tənqidi və publisistik məqalələrlə mütəmadi çıxış edir. O, ali məktəblər üçün dərslik, dərs vəsaitləri və proqramların hazırlanmasında da yaxından iştirak edir.

Tehran Əlişanoğlu ədəbi tənqidlə ardıcıl məşğul olan və ədəbiyyatşünaslıq elminin bu istiqamətini elmi cəhətdən tədqiq edən elm adamıdır. O, geniş elmi dünyagörüşə, professional elmi səriştəyə malik tanınmış tənqidçi və ədəbiyyatşünasdır.

Azərbaycan ədəbiyyatşünaslıq elmində müstəqillik dövrü Azərbaycan ədəbi tənqidinin görkəmli nümayəndəsi Tehran Mustafayevi 65 illik yubileyi münasibətilə təbrik edir, ona möhkəm can sağlığı və elmi fəaliyyətində uğurlar arzulayırıq.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.