Azərbaycan Milli Elmlər Akademiyası

AMEA-nın N.Tusi adına Şamaxı Astrofizika Rəsədxanasının (ŞAR) gənc alim və mütəxəssisləri tərəfindən Biləcəri rayonu 298 saylı orta məktəbdə “Məktəbdən kosmosa” adlı elmi-populyar seminar təşkil olunub.

Seminarda Astronomiyanın prioritet tədqiqat sahələri, cari il üçün baş verəcək Günəş və Ay tutulmaları, ulduzlar, onlarda baş verən proseslər, planetlər, digər qalaktikalar, eyni zamanda astronomiya ilə bağlı ümumi biliklər şagirdlərin diqqətinə çatdırılıb.

N.Tusi adına Şamaxı Astrofizika Rəsədxanasının əməkdaşları Ulduz atmosferləri fizikası və maqnetizm şöbəsinin böyük elmi işçisi, astronomiya üzrə fəlsəfə doktoru Ülkər Rüstəm, Qalaktikalar və ulduz əmələgəlmə prosesləri şöbəsinin böyük laborantları Samirə Rəhimli və Zümrüd Binnətovanın təqdim etdiyi məruzələr iştirakçılar tərəfindən böyük maraqla qarşılanıb.

Məruzələrin yekununda seminar iştirakçılarını maraqlandıran suallar cavablandırılıb.

Elmi populyar seminarda 298 saylı orta məktəbin rəhbərliyi və müəllim heyəti də iştirak ediblər. Məktəbin direktoru Xatirə Hacıyeva post-pandemiya dövründə məktəblərdə elmin təbliği və təşviqi üçün bu cür seminarların daha çox təşkil olunmasının əhəmiyyətini vurğulayıb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.